Goar mansai porlu di halak Batak saonarion, tarlumobi najolo. Ido bahenna beteng-beteng angka goar najolo. Ompu namima contohna. Adongma on Ompu Debata, Ompu Marjanji Omas, Ompu Raja Isaba, lan dope angka na asing. Jadi, tung maol do mangaluilui goar na pas asa marsahala halak na ginoaran i. Unang pola longang hita molo dung pe balga sasahalak asa dapotsa goar na pas. Mardomu tusima cerita on.
Ala ni maolna mandapot goar, mardalanima tolu anak ni Simamora. Pola do sahat nasida tu tano Israel. Lewatma nasida sian jolo ni istana ni si Herodes. Topet hundul-hundul raja Herodes mangadophon dalan ala tarpaima-ima haroro ni angka parroha sian purba. “Mana lu?” manang tudia hamu, ninna si Herodesma tu halak i natolu, “hamu do parroha na sian purba i?”
“Daong amang, par Tipang do hami anak ni Simamora,” ninna nasida. Diuduti mardalan alai sai manginongima roha nasida. “Mana lu, ninna tu hita ate?” ninna si paitonga. “Na dirimpu do haroa adong na margoar manalu ate,” ninna muse.
“Ho do dibereng,” ninna si angkangan, “berarti ho do dianggap Manalu. Ima goarmu. Uli do kan?”
“Ido tutu,” ninna siampudan. “Manalu marlapatanma i manaluhon, menaklukkan, manang to beat or to conquer,” malo do siampudan antong marbahasa. “Ima goarmu bang,” usulna.
Jadi sepakatma nasida Manaluma goar ni sipaitonga.
“Hamu do parroha sian purba i? Didok tu hita ate?” Ninna si angkapangan. “Abang do dibereng raja i tingki mandokhon i,” ninna si Manalu.”Berarti Purbama goarmu bang,” ninna siampudan.
“Olo tutu bah, jago do goar i. Purba lapatanna timur, haroroan ni mataniari. Jadi marsinondangma hasangaponma bang tu liat potibion,” ninna siampudan.
Satolopma nasida, Purbama goar ni si angkangan. Mulakma nasida tu Tipang. Sian na dao nunga manatap-natap Simamora paima-ima anakna na tolu i. Holan sahat tor mengkel supingma Purba dohot Manalu ala nunga dapot nasida goar na mansai uli. Alai siampudan lalap tumatangis ala so adong dope goarna.
“Songon onma i amang,” ninna Simamora, “hulehon pe di ho goar na unsangap dohot na ummuli sian nasa goar di portibion, ima Debata Raja. Dang adong be di ginjang ni Debata Raja. Alai ingot amang da? Asa ingotonmu Debata do na raja, ia ho siseanna do,” udutna (humor/admin).